rah-e-justuju mein bhaTak gae to kisi se koi gila nahin

rah-e-justujū meñ bhaTak ga.e to kisī se koī gilā nahīñ

ki ham us ke ho ke na jī sake vo hamārā ban ke milā nahīñ

mire fikr-o-fan pe muhīt hai jo tasavvur ek ḳhudā-numā

hai talāsh us kī nahīñ pata vo ḳhudā bhī hai ki ḳhudā nahīñ

jo milī nahīñ mujhe āgahī hai mirī nigāh se ajnabī

ho rag-e-gulū se qarīb bhī to yahī kaheñge milā nahīñ

jo basīr ho vo nazar bhī de mujhe āgahī kā hunar bhī de

magar ab tū merī ḳhabar bhī de ki mujhe ḳhud apnā pata nahīñ

haiñ 'shahāb' mere havās gum ki har ek shab hai shab-e-dahum

jo bujhā to bujh ke hī rah gayā hai charāġh phir se jalā nahīñ

rah-e-justuju mein bhaTak gae to kisi se koi gila nahin

ki hum us ke ho ke na ji sake wo hamara ban ke mila nahin

mere fikr-o-fan pe muhit hai jo tasawwur ek KHuda-numa

hai talash us ki nahin pata wo KHuda bhi hai ki KHuda nahin

jo mili nahin mujhe aagahi hai meri nigah se ajnabi

ho rag-e-gulu se qarib bhi to yahi kahenge mila nahin

jo basir ho wo nazar bhi de mujhe aagahi ka hunar bhi de

magar ab tu meri KHabar bhi de ki mujhe KHud apna pata nahin

hain 'shahab' mere hawas gum ki har ek shab hai shab-e-dahum

jo bujha to bujh ke hi rah gaya hai charagh phir se jala nahin