rah-e-kahkashan se guzar gaya hama-in-o-an se guzar gaya

rah-e-kahkashāñ se guzar gayā hama-īn-o-āñ se guzar gayā

koī bazm-e-nāz-o-niyāz meñ maiñ had-o-kamāñ se guzar gayā

na koī jahāñ se guzar sake ye vahāñ vahāñ se guzar gayā

tire 'ishq meñ dil-e-mubtalā har ik imtihāñ se guzar gayā

tire ishq-e-sīna-figār kā ye shu'ūr qābil-e-dād hai

vahī tiir dil se lagā liyā jo tirī kamāñ se guzar gayā

tire husn-e-sajda-navāz kā ye karam jabīn-e-niyāz par

ki mile haram hī haram mujhe maiñ jahāñ jahāñ se guzar gayā

mire nāsehā tirā shukriya mire haal par mujhe chhoḌ de

jo tirī zamīñ pe muhīt hai maiñ us āsmāñ se guzar gayā

ye nizām bazm-e-hayāt kā abhī ḳhalfashār kī nazr thā

vo to shukr hai ki fasāna-ḳhvāñ mirī dāstāñ se guzar gayā

rahe qaid-o-band kī lazzateñ ki aziyyateñ bhī haiñ rāhateñ

maiñ qafas meñ aate hī sarhad-e-ġham-e-āshiyāñ se guzar gayā

na 'vaqār' dair se vāsta na haram se mujh ko koī ġharaz

kisī be-nishāñ kī talāsh meñ maiñ har ik nishāñ se guzar gayā

rah-e-kahkashan se guzar gaya hama-in-o-an se guzar gaya

koi bazm-e-naz-o-niyaz mein main had-o-kaman se guzar gaya

na koi jahan se guzar sake ye wahan wahan se guzar gaya

tere 'ishq mein dil-e-mubtala har ek imtihan se guzar gaya

tere ishq-e-sina-figar ka ye shu'ur qabil-e-dad hai

wahi tir dil se laga liya jo teri kaman se guzar gaya

tere husn-e-sajda-nawaz ka ye karam jabin-e-niyaz par

ki mile haram hi haram mujhe main jahan jahan se guzar gaya

mere naseha tera shukriya mere haal par mujhe chhoD de

jo teri zamin pe muhit hai main us aasman se guzar gaya

ye nizam bazm-e-hayat ka abhi KHalfashaar ki nazr tha

wo to shukr hai ki fasana-KHwan meri dastan se guzar gaya

rahe qaid-o-band ki lazzaten ki aziyyaten bhi hain rahaten

main qafas mein aate hi sarhad-e-gham-e-ashiyan se guzar gaya

na 'waqar' dair se wasta na haram se mujh ko koi gharaz

kisi be-nishan ki talash mein main har ek nishan se guzar gaya