rah-e-talab mein baDi turfagi ke sath chale

rah-e-talab meñ baḌī turfagī ke saath chale

kisī ke saath na the aur sabhī ke saath chale

na ham-safar koī paayā na rāhbar chāhā

vo rāh-rau haiñ ki ham zindagī ke saath chale

fareb ḳhud ko diye aur ḳhud hī pachhtā.e

kisī kā jo na huā ham usī ke saath chale

kaho ki hotī hai ik chiiz sar-bulandī bhī

kahā ye kis ne ki ham sar-kashī ke saath chale

rahe sharīk-e-safar e'timād-e-ham-qadmī

ye kyā zarūr hai koī kisī ke saath chale

shikasta-pā hī sahī rahravān-e-dard magar

ye kam nahīñ ki salāmat-ravī ke saath chale

ḳhud apnā soz-e-talab de sake na jis kā saath

dayār-e-ġham meñ vo kis raushnī ke saath chale

ye kah ke ho ga.e ḳhud se bhī ham judā 'hurmat'

safar meñ kaun kisī ajnabī ke saath chale

rah-e-talab mein baDi turfagi ke sath chale

kisi ke sath na the aur sabhi ke sath chale

na ham-safar koi paya na rahbar chaha

wo rah-rau hain ki hum zindagi ke sath chale

fareb KHud ko diye aur KHud hi pachhtae

kisi ka jo na hua hum usi ke sath chale

kaho ki hoti hai ek chiz sar-bulandi bhi

kaha ye kis ne ki hum sar-kashi ke sath chale

rahe sharik-e-safar e'timad-e-ham-qadmi

ye kya zarur hai koi kisi ke sath chale

shikasta-pa hi sahi rahrawan-e-dard magar

ye kam nahin ki salamat-rawi ke sath chale

KHud apna soz-e-talab de sake na jis ka sath

dayar-e-gham mein wo kis raushni ke sath chale

ye kah ke ho gae KHud se bhi hum juda 'hurmat'

safar mein kaun kisi ajnabi ke sath chale