rah-e-talab mein bane wo nashtar idhar se jate udhar se aate

rah-e-talab meñ bane vo nashtar idhar se jaate udhar se aate

chubhe jo kāñTe qadam qadam par idhar se jaate udhar se aate

kahīñ na thak kar ruke koī dam tavāf-e-bazm-e-habīb meñ ham

mile haiñ dair-o-haram bhī aksar idhar se jaate udhar se aate

jo hasrat-e-jalva thī kisī kī to ḳhaak uḌaa.ī na kyuuñ galī kī

hameñ lagānā thā roz chakkar idhar se jaate udhar se aate

agar bulātā bhī apne ghar meñ to ham ko rakhtā na vo nazar meñ

bahāl-e-muztar ba-shakl-e-abtar idhar se jaate udhar se aate

hue pareshān sab musāfir na niklī sūrat koī bil-āḳhir

jo raah masdūd thī to kyūñkar idhar se jaate udhar se aate

nazar thī gahrī kahāñ kisī kī ye rāh-e-ulfat meñ kyā ḳhabar thī

chubheñge nāvak chaleñge ḳhanjar idhar se jaate udhar se aate

vo ishq-e-sādiq kī paak manzil vo ka.aba-o-dair ke marāhil

mile the raste meñ ham ko do ghar idhar se jaate udhar se aate

hujūm thā mai-kade meñ aisā ki daur kā intizām kaisā

jo raah paate to jām-o-sāġhar idhar se jaate udhar se aate

phirā kiye aap rahguzar meñ kabhī na Thahre hamāre ghar meñ

karam ye karnā thā banda-parvar idhar se jaate udhar se aate

talāsh-e-manzil burī balā thī na thī jo qahr-o-ġhazab to kyā thī

jagah jagah ham ne khaa.ī Thokar idhar se jaate udhar se aate

lagā rahe haiñ fuzūl chakkar jhukā.eñ sar un ke sañg-e-dar par

ham āzmā.eñ kabhī muqaddar idhar se jaate udhar se aate

marīz-e-ulfat kā dam nikaltā na kuchh tag-o-dau kā zor chaltā

vo haath rakkhe hue jigar par idhar se jaate udhar se aate

churā.īñ kyuuñ aap ne nigāheñ ki ho ga.iiñ band dil kī rāheñ

maza to jab thā ye tiir aksar idhar se jaate udhar se aate

kahīñ ho aanā kahīñ ho jaanā magar hai bistar yahīñ jamānā

hameñ Thaharnā tumhāre dar par idhar se jaate udhar se aate

maqām-e-qurb-e-ḳhudā thā mushkil magar na thī un ko fikr-e-manzil

mile jinheñ 'nūh' se payambar idhar se jaate udhar se aate

rah-e-talab mein bane wo nashtar idhar se jate udhar se aate

chubhe jo kanTe qadam qadam par idhar se jate udhar se aate

kahin na thak kar ruke koi dam tawaf-e-bazm-e-habib mein hum

mile hain dair-o-haram bhi aksar idhar se jate udhar se aate

jo hasrat-e-jalwa thi kisi ki to KHak uDai na kyun gali ki

hamein lagana tha roz chakkar idhar se jate udhar se aate

agar bulata bhi apne ghar mein to hum ko rakhta na wo nazar mein

bahaal-e-muztar ba-shakl-e-abtar idhar se jate udhar se aate

hue pareshan sab musafir na nikli surat koi bil-aKHir

jo rah masdud thi to kyunkar idhar se jate udhar se aate

nazar thi gahri kahan kisi ki ye rah-e-ulfat mein kya KHabar thi

chubhenge nawak chalenge KHanjar idhar se jate udhar se aate

wo ishq-e-sadiq ki pak manzil wo kaba-o-dair ke marahil

mile the raste mein hum ko do ghar idhar se jate udhar se aate

hujum tha mai-kade mein aisa ki daur ka intizam kaisa

jo rah pate to jam-o-saghar idhar se jate udhar se aate

phira kiye aap rahguzar mein kabhi na Thahre hamare ghar mein

karam ye karna tha banda-parwar idhar se jate udhar se aate

talash-e-manzil buri bala thi na thi jo qahr-o-ghazab to kya thi

jagah jagah hum ne khai Thokar idhar se jate udhar se aate

laga rahe hain fuzul chakkar jhukaen sar un ke sang-e-dar par

hum aazmaen kabhi muqaddar idhar se jate udhar se aate

mariz-e-ulfat ka dam nikalta na kuchh tag-o-dau ka zor chalta

wo hath rakkhe hue jigar par idhar se jate udhar se aate

churain kyun aap ne nigahen ki ho gain band dil ki rahen

maza to jab tha ye tir aksar idhar se jate udhar se aate

kahin ho aana kahin ho jaana magar hai bistar yahin jamana

hamein Thaharna tumhaare dar par idhar se jate udhar se aate

maqam-e-qurb-e-KHuda tha mushkil magar na thi un ko fikr-e-manzil

mile jinhen 'nuh' se payambar idhar se jate udhar se aate