rah-e-talab mein nasheb-o-faraaz kitne the

rah-e-talab meñ nasheb-o-farāz kitne the

musāfirat meñ musāfir-navāz kitne the

qadam-qadam pe dukāneñ thiiñ sang-zādoñ kī

tumhāre shahr meñ ā.īna-sāz kitne the

ayaañ hue haiñ jo ab tak unheñ shumār na kar

jo gum hue the fazāoñ meñ raaz kitne the

ye aur baat ki chaupāl meñ the log bahut

sadāqatoñ ke amīn-o-majāz kitne the

qasīda-ḳhvāñ to zamāna thā fasl-e-bārāñ kā

ki pyās-rut meñ samundar-tarāz kitne the

qadam-qadam pe mile haiñ alaav nafrat ke

na pochhiye ki mohabbat-navāz kitne the

dukhoñ kī aañch se vo bhī pighal ga.e 'sāġhar'

jo dekhne meñ the patthar gudāz kitne the

rah-e-talab mein nasheb-o-faraaz kitne the

musafirat mein musafir-nawaz kitne the

qadam-qadam pe dukanen thin sang-zadon ki

tumhaare shahr mein aaina-saz kitne the

ayan hue hain jo ab tak unhen shumar na kar

jo gum hue the fazaon mein raaz kitne the

ye aur baat ki chaupal mein the log bahut

sadaqaton ke amin-o-majaz kitne the

qasida-KHwan to zamana tha fasl-e-baran ka

ki pyas-rut mein samundar-taraaz kitne the

qadam-qadam pe mile hain alaw nafrat ke

na pochhiye ki mohabbat-nawaz kitne the

dukhon ki aanch se wo bhi pighal gae 'saghar'

jo dekhne mein the patthar gudaz kitne the