rah gae ashkon mein laKHt-e-jigar aate aate

rah ga.e ashkoñ meñ laḳht-e-jigar aate aate

ruk ga.e bahr se la.al-o-gohar aate aate

tham ga.e qatra-e-ḳhūn-e-jigar aate aate

ruk ga.e mujmar-e-dil se sharar aate aate

hote hote na huā misra-e-rañgīñ mauzūñ

band kyuuñ ho gayā ḳhūn-e-jigar aate aate

tham ga.e ashk mire aañkh se Dhalte Dhalte

rah ga.e chashm-e-sadaf se guhar aate aate

rah gayā kahne pe ġhammāzoñ ke sun sun ke mirī

phir gayā yaar mirā raah par aate aate

de diyā naqd-e-dil us but ko baġhair az jaane

ho gayā raah meñ kaisā zarar aate aate

dekhte dekhte dekheñge mire jauhar-e-tab.a

ā.eñge ā.eñge ahl-e-nazar aate aate

kyā bharā zañg-e-kudūrat se ye ā.īna-dil

jo nazar aa.e na vo phir nazar aate aate

gardish-e-chashm ne kis ko tah-o-bālā na kiyā

ho ga.e zer-o-zabar raah par aate aate

ashk-e-ḳhūnī nahīñ aate haiñ jo āñkhoñ se tirī

kyuuñ rukī 'muntahī' dil kī ḳhabar aate aate

rah gae ashkon mein laKHt-e-jigar aate aate

ruk gae bahr se lal-o-gohar aate aate

tham gae qatra-e-KHun-e-jigar aate aate

ruk gae mujmar-e-dil se sharar aate aate

hote hote na hua misra-e-rangin mauzun

band kyun ho gaya KHun-e-jigar aate aate

tham gae ashk mere aankh se Dhalte Dhalte

rah gae chashm-e-sadaf se guhar aate aate

rah gaya kahne pe ghammazon ke sun sun ke meri

phir gaya yar mera rah par aate aate

de diya naqd-e-dil us but ko baghair az jaane

ho gaya rah mein kaisa zarar aate aate

dekhte dekhte dekhenge mere jauhar-e-taba

aaenge aaenge ahl-e-nazar aate aate

kya bhara zang-e-kudurat se ye aaina-dil

jo nazar aae na wo phir nazar aate aate

gardish-e-chashm ne kis ko tah-o-baala na kiya

ho gae zer-o-zabar rah par aate aate

ashk-e-KHuni nahin aate hain jo aankhon se teri

kyun ruki 'muntahi' dil ki KHabar aate aate