rah gai thi yahi ek baat batane ke liye

rah ga.ī thī yahī ik baat batāne ke liye

ham to aa.e the yahāñ lauT ke jaane ke liye

shauq ne din vo dikhā.e haiñ ki dil jāntā hai

kah diyā thā kabhī dīdār dikhāne ke liye

ab to itnā bhī nahīñ yaad ki vo sūrat-e-ḳhvāb

yaad rakhne ke liye thī ki bhulāne ke liye

dam-e-ḳhūñ-rez bhī jaatī nahīñ shoḳhī un kī

mujh se hī kahte haiñ talvār uThāne ke liye

roz ik rang ubhartā hai sar-e-saf.ha-e-dard

roz ik naqsh banātā huuñ miTāne ke liye

bahr-e-pur-shor meñ ab ḳhush huuñ ki ik mauj-e-sukūt

aane vaalī hai mujhe paar lagāne ke liye

rah gai thi yahi ek baat batane ke liye

hum to aae the yahan lauT ke jaane ke liye

shauq ne din wo dikhae hain ki dil jaanta hai

kah diya tha kabhi didar dikhane ke liye

ab to itna bhi nahin yaad ki wo surat-e-KHwab

yaad rakhne ke liye thi ki bhulane ke liye

dam-e-KHun-rez bhi jati nahin shoKHi un ki

mujh se hi kahte hain talwar uThane ke liye

roz ek rang ubharta hai sar-e-safha-e-dard

roz ek naqsh banata hun miTane ke liye

bahr-e-pur-shor mein ab KHush hun ki ek mauj-e-sukut

aane wali hai mujhe par lagane ke liye