rah gaya dida-e-pur-ab ka saman ho kar

rah gayā dīda-e-pur-āb kā sāmāñ ho kar

vo jo rahtā thā mire saath mirī jaañ ho kar

jaane kis shoḳh ke āñchal ne sharārat kī hai

chāñd phirtā hai sitāroñ meñ pareshāñ ho kar

āte-jāte hue dastak kā takalluf kaisā

apne ghar meñ bhī koī aatā hai mehmāñ ho kar

ab to mujh ko bhī nahīñ miltī mirī koī ḳhabar

kitnā gumnām huā huuñ maiñ numāyāñ ho kar

vo mire sahn meñ utre haiñ ujāle kahiye

shaam taktī hai dar-o-bām ko hairāñ ho kar

maiñ ne us shaḳhs se sīkhā hai takallum kā hunar

vo jo mahfil meñ bhī rahtā thā gurezāñ ho kar

ujḌī ujḌī sī havā ḳhāk-ba-sar aatī hai

shaam utrī hai kahīñ shām-e-ġharībāñ ho kar

ek hañgāma sā yādoñ kā hai dil meñ 'az.har'

kitnā ābād huā shahr ye vīrāñ ho kar

rah gaya dida-e-pur-ab ka saman ho kar

wo jo rahta tha mere sath meri jaan ho kar

jaane kis shoKH ke aanchal ne shararat ki hai

chand phirta hai sitaron mein pareshan ho kar

aate-jate hue dastak ka takalluf kaisa

apne ghar mein bhi koi aata hai mehman ho kar

ab to mujh ko bhi nahin milti meri koi KHabar

kitna gumnam hua hun main numayan ho kar

wo mere sahn mein utre hain ujale kahiye

sham takti hai dar-o-baam ko hairan ho kar

main ne us shaKHs se sikha hai takallum ka hunar

wo jo mahfil mein bhi rahta tha gurezan ho kar

ujDi ujDi si hawa KHak-ba-sar aati hai

sham utri hai kahin sham-e-ghariban ho kar

ek hangama sa yaadon ka hai dil mein 'azhar'

kitna aabaad hua shahr ye viran ho kar