rah hi nahin saka main kabhi chaak se alag

rah hī nahīñ sakā maiñ kabhī chaak se alag

hotī nahīñ hai ḳhaak kabhī ḳhaak se alag

har-gām varġhalāyā hai us ne hayāt ko

bachtā phirā huuñ fitna-e-idrāk se alag

kuchh āñsuoñ ko kūza-e-dil meñ sameT kar

rakkhā hai maiñ ne dīda-e-namnāk se alag

hālāñki apnī vus.at-e-parvāz ke ḳhilāf

uḌtā rahā huuñ maiñ had-e-aflāk se alag

ye bhī hunar 'ajīb hai terā ai ḳhush-libās

ḳhushbū ko tū ne rakkhā hai poshāk se alag

'shākir-husain' apnā bhī anjām thā vahī

ham ho nahīñ sake ḳhas-o-ḳhāshāk se alag

rah hi nahin saka main kabhi chaak se alag

hoti nahin hai KHak kabhi KHak se alag

har-gam warghalaya hai us ne hayat ko

bachta phira hun fitna-e-idrak se alag

kuchh aansuon ko kuza-e-dil mein sameT kar

rakkha hai main ne dida-e-namnak se alag

haalanki apni wusat-e-parwaz ke KHilaf

uDta raha hun main had-e-aflak se alag

ye bhi hunar 'ajib hai tera ai KHush-libas

KHushbu ko tu ne rakkha hai poshak se alag

'shakir-husain' apna bhi anjam tha wahi

hum ho nahin sake KHas-o-KHashak se alag