raha shamil jo mere ratjagon mein kaun tha wo

rahā shāmil jo mere ratjagoñ meñ kaun thā vo

jo thā taskīn-e-jāñ tanhā.iyoñ meñ kaun thā vo

mirī āvāz jaisī aur bhī āvāz thī ik

yaqīnan thā koī to parbatoñ meñ kaun thā vo

jo mere saath pahuñchā manziloñ tak kaun hai ye

jise maiñ chhoḌ aayā rāstoñ meñ kaun thā vo

bahut miltā thā mujh se vaar karne kā tarīqa

jo ik mujh sā thā mere dushmanoñ meñ kaun thā vo

vo terā ġham thā merā aks thā yā vāhima thā

jo mere rū-ba-rū thā ā.inoñ meñ kaun thā vo

kaTe sar ko hathelī par sajā.e ghūmtā thā

mirī bastī kī ḳhvābīda shaboñ meñ kaun thā vo

raha shamil jo mere ratjagon mein kaun tha wo

jo tha taskin-e-jaan tanhaiyon mein kaun tha wo

meri aawaz jaisi aur bhi aawaz thi ek

yaqinan tha koi to parbaton mein kaun tha wo

jo mere sath pahuncha manzilon tak kaun hai ye

jise main chhoD aaya raston mein kaun tha wo

bahut milta tha mujh se war karne ka tariqa

jo ek mujh sa tha mere dushmanon mein kaun tha wo

wo tera gham tha mera aks tha ya wahima tha

jo mere ru-ba-ru tha aainon mein kaun tha wo

kaTe sar ko hatheli par sajae ghumta tha

meri basti ki KHwabida shabon mein kaun tha wo