rahbar bhi kare kya koi dawa mere aage

rahbar bhī kare kyā koī da.avā mire aage

ban jaatā hai jañgal meñ bhī rasta mire aage

maiñ tujh ko sameTūñ yahī koshish rahī har dam

itnā na bikhar ai mirī duniyā mire aage

terī hī tarah maiñ ne luTāyā hai sabhī kuchh

sharminda na kar haath na phailā mire aage

kal tak jo bharam thā vo bharam TuuT gayā hai

shaitān hai koī na farishta mire aage

parbat kī tarah vaqt ke siine meñ gaḌā huuñ

chaltā hī nahīñ zor havā kā mire aage

maiñ ne tujhe anjām se āgāh kiyā thā

achchhā nahīñ terā ye taḌapnā mire aage

sahrā kā musāfir huuñ maiñ ma.alūm hai tujh ko

kyoñ rakhtā hai tū shahr kā naqsha mire aage

bīmār na paḌ jā.ūñ maiñ is baat kā Dar hai

bantā hai har ik shaḳhs masīhā mire aage

duniyā kā ye da.avā hai ki sab saath haiñ mere

aa jaatī hai har baar hī tanhā mire aage

rahbar bhi kare kya koi dawa mere aage

ban jata hai jangal mein bhi rasta mere aage

main tujh ko sameTun yahi koshish rahi har dam

itna na bikhar ai meri duniya mere aage

teri hi tarah main ne luTaya hai sabhi kuchh

sharminda na kar hath na phaila mere aage

kal tak jo bharam tha wo bharam TuT gaya hai

shaitan hai koi na farishta mere aage

parbat ki tarah waqt ke sine mein gaDa hun

chalta hi nahin zor hawa ka mere aage

main ne tujhe anjam se aagah kiya tha

achchha nahin tera ye taDapna mere aage

sahra ka musafir hun main malum hai tujh ko

kyon rakhta hai tu shahr ka naqsha mere aage

bimar na paD jaun main is baat ka Dar hai

banta hai har ek shaKHs masiha mere aage

duniya ka ye dawa hai ki sab sath hain mere

aa jati hai har bar hi tanha mere aage