rahbar-e-tabl-o-nishan aur zara tez qadam

rahbar-e-tabl-o-nishāñ aur zarā tez qadam

haañ mire azm-e-javāñ aur zarā tez qadam

is añdhere se na ghabrā ki zarā aur aage

hai charāġhāñ kā samāñ aur zarā tez qadam

kahīñ māyūs na honā jo nigāhoñ se abhī

un kī mahfil hai nihāñ aur zarā tez qadam

ye yaqīñ hai ki pahuñch jā.eñge un tak ik din

chaliye be-vahm-o-gumāñ aur zarā tez qadam

bujh na jaa.eñ rah-e-hastī meñ tamannā ke charāġh

ḳhvāja-e-rāh-ravāñ aur zarā tez qadam

kis bulandī pe ravāñ tum ho zamīñ ke zarro

haiñ sitāre nigarāñ aur zarā tez qadam

mil hī jā.egā kahīñ shahr-e-nigārāñ 'aḳhtar'

ai parastār-e-butāñ aur zarā tez qadam

rahbar-e-tabl-o-nishan aur zara tez qadam

han mere azm-e-jawan aur zara tez qadam

is andhere se na ghabra ki zara aur aage

hai charaghan ka saman aur zara tez qadam

kahin mayus na hona jo nigahon se abhi

un ki mahfil hai nihan aur zara tez qadam

ye yaqin hai ki pahunch jaenge un tak ek din

chaliye be-wahm-o-guman aur zara tez qadam

bujh na jaen rah-e-hasti mein tamanna ke charagh

KHwaja-e-rah-rawan aur zara tez qadam

kis bulandi pe rawan tum ho zamin ke zarro

hain sitare nigaran aur zara tez qadam

mil hi jaega kahin shahr-e-nigaran 'aKHtar'

ai parastar-e-butan aur zara tez qadam