rahe qaem mera culture mera iman zaban meri

rahe qaa.em mirā culture mirā īmāñ zabāñ merī

na ho gum qulqul-e-mīnā-e-maġhrib meñ azaañ merī

mohabbat meñ bhalā kyā kaam ātīñ dhamkiyāñ merī

hasīnoñ ne pakaḌ kar toḌ dī haiñ pasliyāñ merī

mazā jab hai ki ik hī qabr meñ hoñ dafn ham donoñ

vo kyā marnā vahāñ terī lahad ho aur yahāñ merī

kitchen meñ toḌ kar anDe sitam toḌā hai ye kah kar

safedī aap kī hai aur saarī zardiyāñ merī

sunā hai ik balā-e-nā-gahāñ rocket meñ utregī

nazar us vāste rahtī hai sū-e-asmāñ merī

kahā gorī ne kursī par adab se baiThnā sīkho

nigoḌe toḌ diiñ do din meñ saarī kursiyāñ merī

lifāfe meñ chhachhūñdar band karke ab maiñ bhejūñgā

paḌhā kartā hai chiTThī khol kar chiTThī-rasāñ merī

kahā biivī ne shauhar se ki bachchoñ kī ḳhabar rakhnā

chalo daftar chalī maiñ mujh ko denā jūtiyāñ merī

bahār aane pe bulbul dekhnā jashn-e-bahārāñ meñ

qafas meñ nāchtī hoñgī qafas kī titliyāñ merī

mirī mauj-e-suḳhan 'bulbul' kahīñ dariyā na ban jaa.e

bahut rokā pa ruktī hī nahīñ tab-e-ravāñ merī

rahe qaem mera culture mera iman zaban meri

na ho gum qulqul-e-mina-e-maghrib mein azan meri

mohabbat mein bhala kya kaam aatin dhamkiyan meri

hasinon ne pakaD kar toD di hain pasliyan meri

maza jab hai ki ek hi qabr mein hon dafn hum donon

wo kya marna wahan teri lahad ho aur yahan meri

kitchen mein toD kar anDe sitam toDa hai ye kah kar

safedi aap ki hai aur sari zardiyan meri

suna hai ek bala-e-na-gahan rocket mein utregi

nazar us waste rahti hai su-e-asman meri

kaha gori ne kursi par adab se baiThna sikho

nigoDe toD din do din mein sari kursiyan meri

lifafe mein chhachhundar band karke ab main bhejunga

paDha karta hai chiTThi khol kar chiTThi-rasan meri

kaha biwi ne shauhar se ki bachchon ki KHabar rakhna

chalo daftar chali main mujh ko dena jutiyan meri

bahaar aane pe bulbul dekhna jashn-e-bahaaran mein

qafas mein nachti hongi qafas ki titliyan meri

meri mauj-e-suKHan 'bulbul' kahin dariya na ban jae

bahut roka pa rukti hi nahin tab-e-rawan meri