rahi gar sohbat-e-aghyar baqi

rahī gar sohbat-e-aġhyār baaqī

to kaahe ko raheñge yaar baaqī

garebāñ meñ mire dast-e-junūñ ne

na chhoḌā naam ko ab taar baaqī

nahīñ āshiq ke tan meñ ḳhuun kī buuñd

rahī ai dīda-e-ḳhūñ-bār baaqī

na chhoḌī shaiḳh jī sāhab ke sar par

sunā rindoñ ne kal dastār baaqī

rahegā yūñhī tā roz-e-qayāmat

ḳhilāf-e-sub.ha-o-zunnār baaqī

mohabbat meñ butoñ kī mar miTe haiñ

rahā hai ik faqat huñkār baaqī

vale is sard-mehrī-e-falak kī

hai vo hī garmī-e-bāzār baaqī

ye pūchhā maiñ ne ik din apne dil se

havas hai tum ko kuchh ai yaar baaqī

kahā us ne agar mil jaa.e vo shoḳh

to kahnā kuchh nahīñ zinhār baaqī

tire bīmār-e-ġham ko hai to bas hai

faqat ik hasrat-e-dīdār baaqī

evaz bose ke dil deñge unheñ 'aish'

nahīñ ab is meñ kuchh takrār baaqī

rahi gar sohbat-e-aghyar baqi

to kahe ko rahenge yar baqi

gareban mein mere dast-e-junun ne

na chhoDa nam ko ab tar baqi

nahin aashiq ke tan mein KHun ki bund

rahi ai dida-e-KHun-bar baqi

na chhoDi shaiKH ji sahab ke sar par

suna rindon ne kal dastar baqi

rahega yunhi ta roz-e-qayamat

KHilaf-e-subha-o-zunnar baqi

mohabbat mein buton ki mar miTe hain

raha hai ek faqat hunkar baqi

wale is sard-mehri-e-falak ki

hai wo hi garmi-e-bazar baqi

ye puchha main ne ek din apne dil se

hawas hai tum ko kuchh ai yar baqi

kaha us ne agar mil jae wo shoKH

to kahna kuchh nahin zinhaar baqi

tere bimar-e-gham ko hai to bas hai

faqat ek hasrat-e-didar baqi

ewaz bose ke dil denge unhen 'aish'

nahin ab is mein kuchh takrar baqi