rahmaton mein teri aaghosh ki pale gae hum

rahmatoñ meñ tirī āġhosh kī paale ga.e ham

aise mardūd hue phir ki nikāle ga.e ham

āsmānoñ ko sambhāle rahī qudrat terī

itne sarkash the ki tujh se na sambhāle ga.e ham

ishq kī bū thī tajassus kā nasha shauq kā rañg

sāġhar-e-gul meñ tire vāste Dhāle ga.e ham

tajrabāt apne muqaddar meñ liye marhala-vār

tere bāzār-e-tamāshā meñ uchhāle ga.e ham

jins-e-ehsās kī dūkān pe sannāTā thā

koī gāhak na thā is kā to uThā le ga.e ham

ro.ab taarī thā zabāñ par tirā maḳhlūq thī chup

ham to āshiq the ġham-e-hijr sunā le ga.e ham

luuT le chain koī ye na huā thā ab tak

mutma.in rah gayā vo aur churā le ga.e ham

rahmaton mein teri aaghosh ki pale gae hum

aise mardud hue phir ki nikale gae hum

aasmanon ko sambhaale rahi qudrat teri

itne sarkash the ki tujh se na sambhaale gae hum

ishq ki bu thi tajassus ka nasha shauq ka rang

saghar-e-gul mein tere waste Dhaale gae hum

tajrabaat apne muqaddar mein liye marhala-war

tere bazar-e-tamasha mein uchhaale gae hum

jins-e-ehsas ki dukan pe sannaTa tha

koi gahak na tha is ka to uTha le gae hum

roab tari tha zaban par tera maKHluq thi chup

hum to aashiq the gham-e-hijr suna le gae hum

luT le chain koi ye na hua tha ab tak

mutmain rah gaya wo aur chura le gae hum