rahne diya na chain se lail-o-nahaar ne

rahne diyā na chain se lail-o-nahār ne

maarā ġham-e-hayāt-o-ġham-e-rozgār ne

ik kaif pā liyā hai dil-e-be-qarār ne

phir gudgudā diyā hai nasīm-e-bahār ne

jalvoñ kī taab lā na sakā bazm-e-nāz meñ

khoyā ḳhud e.atibār dil-e-be-qarār ne

chheḌe na koī merī mohabbat kī dāstāñ

khāyā hai taaza zaḳhm dil-e-dāġh-dār ne

duniyā kā ġham kabhī ġham-e-uqbā kabhī rahā

paayā na chain mere dil-e-be-qarār ne

dāman se un ke lipTī kabhī ruḳh se jā lagī

kyā kyā maze na luuTe haiñ musht-e-ġhubār ne

uTThī kabhī naqāb to khil uTThī chāñdnī

jalve bikher Daale haiñ ruḳhsār-e-yār ne

miltā jo umr bhar na mujhe vasl-e-yār se

vo kaif de diyā hai tire intizār ne

duniyā-e-ishq meñ vahī sābit-qadam rahā

baḳhshā junūn-e-ishq jise tere pyaar ne

aatā nahīñ hai aaj bhī vo sāmne 'shafī.a'

baḳhshā jahān ko to usī parda-dār ne

rahne diya na chain se lail-o-nahaar ne

mara gham-e-hayat-o-gham-e-rozgar ne

ek kaif pa liya hai dil-e-be-qarar ne

phir gudguda diya hai nasim-e-bahaar ne

jalwon ki tab la na saka bazm-e-naz mein

khoya KHud eatibar dil-e-be-qarar ne

chheDe na koi meri mohabbat ki dastan

khaya hai taza zaKHm dil-e-dagh-dar ne

duniya ka gham kabhi gham-e-uqba kabhi raha

paya na chain mere dil-e-be-qarar ne

daman se un ke lipTi kabhi ruKH se ja lagi

kya kya maze na luTe hain musht-e-ghubar ne

uTThi kabhi naqab to khil uTThi chandni

jalwe bikher Dale hain ruKHsar-e-yar ne

milta jo umr bhar na mujhe wasl-e-yar se

wo kaif de diya hai tere intizar ne

duniya-e-ishq mein wahi sabit-qadam raha

baKHsha junun-e-ishq jise tere pyar ne

aata nahin hai aaj bhi wo samne 'shafia'

baKHsha jahan ko to usi parda-dar ne