rahne do ek do-ghaDi diwar-o-dar ke samne

rahne do ik do-ghaḌī dīvār-o-dar ke sāmne

ek muddat baa'd aayā huuñ maiñ ghar ke sāmne

tum ko da.avā hai ki tum patthar ho maiñ kahtā huuñ mom

faisla ho jā.egā aao sharar ke sāmne

ek qātil jo mushābah merī hī sūrat se thā

qatl mujh ko kar gayā merī nazar ke sāmne

ab sar-e-manzar samandar hai lahū kā aur maiñ

haT gayā koī aqab meñ mujh ko kar ke sāmne

āsmāñ sat.h-e-zamīñ se ab nazar aatā nahīñ

sar se bhī ūñchī hai ik dīvār sar ke sāmne

pī rahā huuñ shaam se apnī shikastoñ kā lahū

yaas rakhtī jā rahī hai jaam bhar ke sāmne

maiñ ne dekhā aa.ine ko aks meñ chhupte hue

ye tamāshā bhī huā merī nazar ke sāmne

nuqta-e-āġhāz par har baar lauT aatā huuñ maiñ

rāsta hī ḳhatm hai har rahguzar ke sāmne

bah ga.e 'mohsin' tan-āvar peḌ bhī sailāb meñ

chand tinkoñ kī haqīqat kyā shajar ke sāmne

rahne do ek do-ghaDi diwar-o-dar ke samne

ek muddat ba'd aaya hun main ghar ke samne

tum ko dawa hai ki tum patthar ho main kahta hun mom

faisla ho jaega aao sharar ke samne

ek qatil jo mushabah meri hi surat se tha

qatl mujh ko kar gaya meri nazar ke samne

ab sar-e-manzar samandar hai lahu ka aur main

haT gaya koi aqab mein mujh ko kar ke samne

aasman sath-e-zamin se ab nazar aata nahin

sar se bhi unchi hai ek diwar sar ke samne

pi raha hun sham se apni shikaston ka lahu

yas rakhti ja rahi hai jam bhar ke samne

main ne dekha aaine ko aks mein chhupte hue

ye tamasha bhi hua meri nazar ke samne

nuqta-e-aghaz par har bar lauT aata hun main

rasta hi KHatm hai har rahguzar ke samne

bah gae 'mohsin' tan-awar peD bhi sailab mein

chand tinkon ki haqiqat kya shajar ke samne