rahne ko sirf jism tha zer-e-zamin raha

rahne ko sirf jism thā zer-e-zamīñ rahā

jo kuchh thā mere paas yahāñ kā yahīñ rahā

logoñ kā kyā hai un kā ravayya yahī to hai

aisā nahīñ rahā kabhī vaisā nahīñ rahā

ho mushkiloñ kā daur ki ḳhushiyoñ kā silsila

har haal meñ mujhe to usī par yaqīñ rahā

dil meñ hī rah ga.ī hai talab us ke diid kī

parda-nashīñ to aaj bhī parda-nashīñ rahā

us ko baḌā ġhurūr thā mastāna chaal par

Thokar lagī phir aisī kahīñ kā nahīñ rahā

āvārgī ne saath nahīñ chhoḌā umr-bhar

maiñ aur merā zehn kahīñ dil kahīñ rahā

jitnī kahāniyāñ thiiñ faqat rāstoñ kī thiiñ

manzil pe aa ke lutf hī baaqī nahīñ rahā

milne kī aas āḳhirī-dam tak banī rahī

be-jān jism thā mirā zinda yaqīñ rahā

rahne ko sirf jism tha zer-e-zamin raha

jo kuchh tha mere pas yahan ka yahin raha

logon ka kya hai un ka rawayya yahi to hai

aisa nahin raha kabhi waisa nahin raha

ho mushkilon ka daur ki KHushiyon ka silsila

har haal mein mujhe to usi par yaqin raha

dil mein hi rah gai hai talab us ke did ki

parda-nashin to aaj bhi parda-nashin raha

us ko baDa ghurur tha mastana chaal par

Thokar lagi phir aisi kahin ka nahin raha

aawargi ne sath nahin chhoDa umr-bhar

main aur mera zehn kahin dil kahin raha

jitni kahaniyan thin faqat raston ki thin

manzil pe aa ke lutf hi baqi nahin raha

milne ki aas aaKHiri-dam tak bani rahi

be-jaan jism tha mera zinda yaqin raha