rakhi na gai dil mein koi baat chhupa kar

rakhī na ga.ī dil meñ koī baat chhupā kar

dīvār se Thahrā thā koī kaan lagā kar

tū ḳhvāb hai yā koī haqīqat nahīñ ma.alūm

kartī huuñ maiñ tasdīq abhī battī jalā kar

maa.il thī maiñ ḳhud us kī taraf kyā patā us ko

vo mujh se muḳhātab huā rūmāl girā kar

milne ke liye kaisī jagah DhūñDh lī tum ne

maiñ chhū bhī nahīñ saktī tumheñ haath baḌhā kar

guzrī kisī kī raat ġham-e-hijr meñ rote

kamra kisī ne rakkhā thā phūloñ se sajā kar

phir koī nayā kaam nikal aayā thā kam-baḳht

baiThī bhī nahīñ thī maiñ abhī khānā banā kar

beTe ne kahā maañ mujhe matlab bhī batāo

uThne hī lagī thī use qur.ān paḌhā kar

rakhi na gai dil mein koi baat chhupa kar

diwar se Thahra tha koi kan laga kar

tu KHwab hai ya koi haqiqat nahin malum

karti hun main tasdiq abhi batti jala kar

mail thi main KHud us ki taraf kya pata us ko

wo mujh se muKHatab hua rumal gira kar

milne ke liye kaisi jagah DhunDh li tum ne

main chhu bhi nahin sakti tumhein hath baDha kar

guzri kisi ki raat gham-e-hijr mein rote

kamra kisi ne rakkha tha phulon se saja kar

phir koi naya kaam nikal aaya tha kam-baKHt

baiThi bhi nahin thi main abhi khana bana kar

beTe ne kaha man mujhe matlab bhi batao

uThne hi lagi thi use quran paDha kar