raKHt rah-gir chhoD aae hain

raḳht rah-gīr chhoḌ aa.e haiñ

paañv zanjīr chhoḌ aa.e haiñ

qaid-ḳhāne ke ek kone meñ

apnī tasvīr chhoḌ aa.e haiñ

ḳhvāb āñkhoñ ke saath le aa.e

aur tā'bīr chhoḌ aa.e haiñ

vo bhī lahore se chalī aa.ī

ham bhī kashmīr chhoḌ aa.e haiñ

ḳhaar kī rah-guzar mahakne ko

phuul tāsīr chhoḌ aa.e haiñ

yād-e-māzī ko dil uThā laayā

zaḳhm iksīr chhoḌ aa.e haiñ

zang-ālūd ho ga.ī hogī

ham jo shamshīr chhoḌ aa.e haiñ

ek chhoTā sā halqa-e-yārāñ

yā'nī jāgīr chhoḌ aa.e haiñ

lakhna.ū chhoḌne ke baa'd lagā

sohbat-e-'mīr' chhoḌ aa.e haiñ

jald lauTegā aap kā 'mehvar'

us ko tahrīr chhoḌ aa.e haiñ

raKHt rah-gir chhoD aae hain

panw zanjir chhoD aae hain

qaid-KHane ke ek kone mein

apni taswir chhoD aae hain

KHwab aankhon ke sath le aae

aur ta'bir chhoD aae hain

wo bhi lahore se chali aai

hum bhi kashmir chhoD aae hain

KHar ki rah-guzar mahakne ko

phul tasir chhoD aae hain

yaad-e-mazi ko dil uTha laya

zaKHm iksir chhoD aae hain

zang-alud ho gai hogi

hum jo shamshir chhoD aae hain

ek chhoTa sa halqa-e-yaran

ya'ni jagir chhoD aae hain

lakhnau chhoDne ke ba'd laga

sohbat-e-'mir' chhoD aae hain

jald lauTega aap ka 'mehwar'

us ko tahrir chhoD aae hain