ramz-e-hayat aalam-e-fani mein kho gaya

ramz-e-hayāt ālam-e-fānī meñ kho gayā

merā vajūd naql-e-makānī meñ kho gayā

kyā jaane kyā kashish thī tumhāre kalām meñ

jis ne sunā vo lafz-o-ma.ānī meñ kho gayā

jo duur tak nahīñ the vahī ab haiñ sāmne

kirdār merā us kī kahānī meñ kho gayā

dariyā se bhī kahīñ koī sailāb jab uThā

vo bhī in āñsuoñ kī ravānī meñ kho gayā

jo kuchh kahā nazar ne nazar se sune vo kaun

har shaḳhs guftugū-e-lisānī meñ kho gayā

duniyā-e-ilm-o-fan meñ jo hāsil thā kal use

saarā kamāl charb-zabānī meñ kho gayā

ehsās phir za.īfī meñ 'rahbar' huā unheñ

lutf-e-hayāt jin kā javānī meñ kho gayā

ramz-e-hayat aalam-e-fani mein kho gaya

mera wajud naql-e-makani mein kho gaya

kya jaane kya kashish thi tumhaare kalam mein

jis ne suna wo lafz-o-maani mein kho gaya

jo dur tak nahin the wahi ab hain samne

kirdar mera us ki kahani mein kho gaya

dariya se bhi kahin koi sailab jab uTha

wo bhi in aansuon ki rawani mein kho gaya

jo kuchh kaha nazar ne nazar se sune wo kaun

har shaKHs guftugu-e-lisani mein kho gaya

duniya-e-ilm-o-fan mein jo hasil tha kal use

sara kamal charb-zabani mein kho gaya

ehsas phir zaifi mein 'rahbar' hua unhen

lutf-e-hayat jin ka jawani mein kho gaya