rang bharna kabhi KHakon mein kahani likhna

rang bharnā kabhī ḳhākoñ meñ kahānī likhnā

dāstāñ ġham kī koī yaad purānī likhnā

dekhnā jo bhī samo denā use lafzoñ meñ

kabhī auroñ kī kabhī apnī kahānī likhnā

kholnā jab kabhī guzre hue lamhoñ ke kivāḌ

sub.h armān-bharī shaam suhānī likhnā

pahle rakh denā charāġhoñ ko sar-e-rāh-guzar

phir kisī bhaTke musāfir kī kahānī likhnā

kabhī rim-jhim kabhī ḳhushbū to kabhī bād-e-nasīm

us ke lahje ko bahāroñ kī javānī likhnā

yaad meñ us kī jo takiye ko bhigo dete haiñ

un ko motī hī nahīñ lā’l-e-yamānī likhnā

dard aur pyaar meñ kyā rishta hai is ko bhī kabhī

de jo mohlat tumheñ ashkoñ kī ravānī likhnā

chand ash'ār se kyā hogī tasallī 'tasnīm'

likhne baiThī ho to ab saarī kahānī likhnā

rang bharna kabhi KHakon mein kahani likhna

dastan gham ki koi yaad purani likhna

dekhna jo bhi samo dena use lafzon mein

kabhi auron ki kabhi apni kahani likhna

kholna jab kabhi guzre hue lamhon ke kiwaD

subh arman-bhari sham suhani likhna

pahle rakh dena charaghon ko sar-e-rah-guzar

phir kisi bhaTke musafir ki kahani likhna

kabhi rim-jhim kabhi KHushbu to kabhi baad-e-nasim

us ke lahje ko bahaaron ki jawani likhna

yaad mein us ki jo takiye ko bhigo dete hain

un ko moti hi nahin la’l-e-yamani likhna

dard aur pyar mein kya rishta hai is ko bhi kabhi

de jo mohlat tumhein ashkon ki rawani likhna

chand ash'ar se kya hogi tasalli 'tasnim'

likhne baiThi ho to ab sari kahani likhna