rang-e-KHulus gang-o-jaman mein nahin raha

rañg-e-ḳhulūs gañg-o-jaman meñ nahīñ rahā

kyā husn thā jo arz-e-vatan meñ nahīñ rahā

kartā nahīñ hai dasht-e-tamannā meñ koī ram

ab vo ġhazāl shauq-e-ḳhutan meñ nahīñ rahā

ashjār-e-gul ko maiñ ne hī sīñchā tamām-umr

ḳhushbū use milī jo chaman meñ nahīñ rahā

yak-laḳht mujh pe us ke sab asrār khul ga.e

ab koī jin charāġh-e-badan meñ nahīñ rahā

tabdīl ho ga.e haiñ javāñ-sāl ḳhāl-o-ḳhad

vo bāñkpan bhī tere suḳhan meñ nahīñ rahā

maiñ tishna-kām us ke kināre gayā 'salīm'

lekin vo aab ḳhitta-e-tan meñ nahīñ rahā

rang-e-KHulus gang-o-jaman mein nahin raha

kya husn tha jo arz-e-watan mein nahin raha

karta nahin hai dasht-e-tamanna mein koi ram

ab wo ghazal shauq-e-KHutan mein nahin raha

ashjar-e-gul ko main ne hi sincha tamam-umr

KHushbu use mili jo chaman mein nahin raha

yak-laKHt mujh pe us ke sab asrar khul gae

ab koi jin charagh-e-badan mein nahin raha

tabdil ho gae hain jawan-sal KHal-o-KHad

wo bankpan bhi tere suKHan mein nahin raha

main tishna-kaam us ke kinare gaya 'salim'

lekin wo aab KHitta-e-tan mein nahin raha