rang-e-shafaq bas husn-e-nazar ho ye bhi to ho sakta hai

rang-e-shafaq bas husn-e-nazar ho ye bhī to ho saktā hai

shaam kā chehra ḳhuun se tar ho ye bhī to ho saktā hai

ek chamaktī shai ko āḳhir tum aañsū kyoñ samjhe ho

dast-e-ḳhudī meñ koī guhar ho ye bhī to ho saktā hai

sab kahte haiñ kho kar us ko khoyā khoyā rahtā huuñ

us kā tasavvur ḳhvāb-asar ho ye bhī to ho saktā hai

jehd-e-musalsal ke matavālo duur dhueñ kā Tiila sā

koī sāya-dār shajar ho ye bhī to ho saktā hai

rāh-e-vafā meñ chalte chalte saath kahīñ vo chhoḌ na de

us ko bhī is baat kā Dar ho ye bhī to ho saktā hai

mumkin hai vo jugnū hī hoñ jo jalte aur bujhte haiñ

tārīkī meñ raqs-e-sharar ho ye bhī to ho saktā hai

mushkil hai andāza lagānā sheroñ se shaḳhsiyyat kā

rang-e-'muazzam' sirf hunar ho ye bhī to ho saktā hai

rang-e-shafaq bas husn-e-nazar ho ye bhi to ho sakta hai

sham ka chehra KHun se tar ho ye bhi to ho sakta hai

ek chamakti shai ko aaKHir tum aansu kyon samjhe ho

dast-e-KHudi mein koi guhar ho ye bhi to ho sakta hai

sab kahte hain kho kar us ko khoya khoya rahta hun

us ka tasawwur KHwab-asar ho ye bhi to ho sakta hai

jehd-e-musalsal ke matawalo dur dhuen ka Tila sa

koi saya-dar shajar ho ye bhi to ho sakta hai

rah-e-wafa mein chalte chalte sath kahin wo chhoD na de

us ko bhi is baat ka Dar ho ye bhi to ho sakta hai

mumkin hai wo jugnu hi hon jo jalte aur bujhte hain

tariki mein raqs-e-sharar ho ye bhi to ho sakta hai

mushkil hai andaza lagana sheron se shaKHsiyyat ka

rang-e-'muazzam' sirf hunar ho ye bhi to ho sakta hai