rang-e-sharab se meri niyyat badal gai

rang-e-sharāb se mirī niyyat badal ga.ī

vaa.iz kī baat rah ga.ī saaqī kī chal ga.ī

tayyār the namāz pe ham sun ke zikr-e-hūr

jalva butoñ kā dekh ke niyyat badal ga.ī

machhlī ne Dhiil paa.ī hai luqme pe shaad hai

sayyād mutma.in hai ki kāñTā nigal ga.ī

chamkā tirā jamāl jo mahfil meñ vaqt-e-shām

parvāna be-qarār huā sham.a jal ga.ī

uqbā kī bāz-purs kā jaatā rahā ḳhayāl

duniyā kī lazzatoñ meñ tabī.at bahal ga.ī

hasrat bahut taraqqī-e-duḳhtar kī thī unheñ

parda jo uTh gayā to vo āḳhir nikal ga.ī

rang-e-sharab se meri niyyat badal gai

waiz ki baat rah gai saqi ki chal gai

tayyar the namaz pe hum sun ke zikr-e-hur

jalwa buton ka dekh ke niyyat badal gai

machhli ne Dhil pai hai luqme pe shad hai

sayyaad mutmain hai ki kanTa nigal gai

chamka tera jamal jo mahfil mein waqt-e-sham

parwana be-qarar hua shama jal gai

uqba ki baz-purs ka jata raha KHayal

duniya ki lazzaton mein tabiat bahal gai

hasrat bahut taraqqi-e-duKHtar ki thi unhen

parda jo uTh gaya to wo aaKHir nikal gai