rang juda aahang juda mahkar juda

rañg judā āhañg judā mahkār judā

pahle se ab lagtā hai gulzār judā

naġhmoñ kī taḳhlīq kā mausam biit gayā

TuuTā saaz to ho gayā taar se taar judā

be-zārī se apnā apnā jaam liye

baiThā hai mahfil meñ har mai-ḳhvār judā

milā thā pahle darvāze se darvāza

lekin ab dīvār se hai dīvār judā

yaaro maiñ to niklā huuñ jaañ bechne ko

tum koī ab socho kārobār judā

sochtā hai ik shā.ir bhī ik tājir bhī

lekin sab kī soch kā hai me.aar judā

kyā lenā is girgiT jaisī duniyā se

aa.e rañg nazar jis kā har baar judā

apnā to hai zāhir-o-bātin ek magar

yāroñ kī guftār judā kirdār judā

mil jaatā hai mauqa ḳhūnī lahroñ ko

hāthoñ se jab hote haiñ patvār judā

kis ne diyā hai sadā kisī kā saath 'qatīl'

ho jaanā hai sab ko āḳhir-kār judā

rang juda aahang juda mahkar juda

pahle se ab lagta hai gulzar juda

naghmon ki taKHliq ka mausam bit gaya

TuTa saz to ho gaya tar se tar juda

be-zari se apna apna jam liye

baiTha hai mahfil mein har mai-KHwar juda

mila tha pahle darwaze se darwaza

lekin ab diwar se hai diwar juda

yaro main to nikla hun jaan bechne ko

tum koi ab socho karobar juda

sochta hai ek shair bhi ek tajir bhi

lekin sab ki soch ka hai mear juda

kya lena is girgiT jaisi duniya se

aae rang nazar jis ka har bar juda

apna to hai zahir-o-baatin ek magar

yaron ki guftar juda kirdar juda

mil jata hai mauqa KHuni lahron ko

hathon se jab hote hain patwar juda

kis ne diya hai sada kisi ka sath 'qatil'

ho jaana hai sab ko aaKHir-kar juda