rang KHushbu aur gul-o-gulzar ki hai raushni

rang ḳhushbū aur gul-o-gulzār kī hai raushnī

merī nas nas meñ tumhāre pyaar kī hai raushnī

mere hoñToñ par ujāle haiñ lab-e-dildār ke

merī āñkhoñ meñ nigāh-e-yār kī hai raushnī

rāhat-e-jāñ ke ujāle dekhtī huuñ jā-ba-jā

baaġh meñ qurbat ke barg-o-bār kī hai raushnī

terī ḳhushbū is tarah utrī hai rūh-o-jism meñ

merī sāñsoñ meñ tirī mahkār kī hai raushnī

ek dīvār-e-rifāqat jo pas-e-dīvār hai

merī dīvāroñ pe us dīvār kī hai raushnī

ab charāġhoñ ko bujhā de ai havā-e-nīm-shab

taaq meñ mere mire dildār kī hai raushnī

rang KHushbu aur gul-o-gulzar ki hai raushni

meri nas nas mein tumhaare pyar ki hai raushni

mere honTon par ujale hain lab-e-dildar ke

meri aankhon mein nigah-e-yar ki hai raushni

rahat-e-jaan ke ujale dekhti hun ja-ba-ja

bagh mein qurbat ke barg-o-bar ki hai raushni

teri KHushbu is tarah utri hai ruh-o-jism mein

meri sanson mein teri mahkar ki hai raushni

ek diwar-e-rifaqat jo pas-e-diwar hai

meri diwaron pe us diwar ki hai raushni

ab charaghon ko bujha de ai hawa-e-nim-shab

taq mein mere mere dildar ki hai raushni