rang KHwabon ke nae aankh mein bhar jata hai

rang ḳhvāboñ ke na.e aañkh meñ bhar jaatā hai

pyaar nashshe kī tarah jaañ meñ utar jaatā hai

vo to bas ek hī pal diid atā kartā hai

jaate jaate hī magar us kā asar jaatā hai

sar jhukā.e hue yuuñ ab ke havā chaltī hai

jaise va.adoñ se koī shaḳhs mukar jaatā hai

us ne bhī choT koī husn se khaa.ī hogī

chāñd ko dekh samundar jo biphar jaatā hai

ek āzād ravayye kī mahak hai un meñ

dil parindoñ kī rifāqat meñ nikhar jaatā hai

jab bichhaḌtā hai koī bāñsurī ro uThtī hai

shaam ke sahn meñ ik dard bikhar jaatā hai

lafz āvāz ke jangal meñ bhaTaktā hai magar

us ke hoñToñ se adā ho to sañvar jaatā hai

rang KHwabon ke nae aankh mein bhar jata hai

pyar nashshe ki tarah jaan mein utar jata hai

wo to bas ek hi pal did ata karta hai

jate jate hi magar us ka asar jata hai

sar jhukae hue yun ab ke hawa chalti hai

jaise wadon se koi shaKHs mukar jata hai

us ne bhi choT koi husn se khai hogi

chand ko dekh samundar jo biphar jata hai

ek aazad rawayye ki mahak hai un mein

dil parindon ki rifaqat mein nikhar jata hai

jab bichhaDta hai koi bansuri ro uThti hai

sham ke sahn mein ek dard bikhar jata hai

lafz aawaz ke jangal mein bhaTakta hai magar

us ke honTon se ada ho to sanwar jata hai