rang laega hamari be-zabani ka hunar

rang lā.egā hamārī be-zabānī kā hunar

aam hogā ab yahāñ ātish-bayānī kā hunar

ik tabassum se jagā dī gulsitāñ kī har ravish

dekhiye us rashk-e-gul kī gul-fishānī kā hunar

dosto ye to fareb-o-maslahat kā daur hai

qissa-e-pārīna hai ab mehrbānī kā hunar

ham jise hamrāz samjhe the vahī niklā raqīb

ham ko le Duubā hamārī ḳhush-gumānī kā hunar

sach ko kar de jhuuT aur nā-mo'tabar ko mo'atabar

dekhiye is daur kī jādū-bayānī kā hunar

jazba-o-ehsās ko hai naġhmagī dene kā fan

shā.irī 'sayyad' nahīñ lafz-o-ma.ānī kā hunar

rang laega hamari be-zabani ka hunar

aam hoga ab yahan aatish-bayani ka hunar

ek tabassum se jaga di gulsitan ki har rawish

dekhiye us rashk-e-gul ki gul-fishani ka hunar

dosto ye to fareb-o-maslahat ka daur hai

qissa-e-parina hai ab mehrbani ka hunar

hum jise hamraaz samjhe the wahi nikla raqib

hum ko le Duba hamari KHush-gumani ka hunar

sach ko kar de jhuT aur na-mo'tabar ko mo'atabar

dekhiye is daur ki jadu-bayani ka hunar

jazba-o-ehsas ko hai naghmagi dene ka fan

shairi 'sayyad' nahin lafz-o-maani ka hunar