rang-o-sifat-e-yar mein dil Dhal nahin raha

rañg-o-sifāt-e-yār meñ dil Dhal nahīñ rahā

sho.aloñ kī zad meñ phuul hai aur jal nahīñ rahā

vo dhuup hai ki peḌ bhī jalne pe aa gayā

vo bhuuk hai ki shāḳh pe ab phal nahīñ rahā

le aao merī aañkh kī lau ke qarīb use

tum se bujhā charāġh agar jal nahīñ rahā

ham log ab zamān-o-zamāna se duur haiñ

ya.anī yahāñ pe vaqt bhī ab chal nahīñ rahā

rang-o-sifat-e-yar mein dil Dhal nahin raha

shoalon ki zad mein phul hai aur jal nahin raha

wo dhup hai ki peD bhi jalne pe aa gaya

wo bhuk hai ki shaKH pe ab phal nahin raha

le aao meri aankh ki lau ke qarib use

tum se bujha charagh agar jal nahin raha

hum log ab zaman-o-zamana se dur hain

yani yahan pe waqt bhi ab chal nahin raha