rang parida zulf pareshan

rang parīda zulf pareshāñ

chashm-e-ġhazālāñ hairāñ hairāñ

gesu-e-mushkīñ shab kī siyāhī

sūrat ḳhandāñ māh-e-tābāñ

pahlī pahlī baar mile to

vo bhī nādāñ ham bhī nādāñ

un kā vo iz.hār-e-mohabbat

thoḌā zāhir thoḌā pinhāñ

un kī hālat vaqt-e-ruḳhsat

hoñT larazte āñkheñ giryāñ

un kā achānak tark-e-ta.alluq

mirī shikast-o-reḳht kā sāmāñ

mil jaate haiñ raahe gaahe

nādim nādim ḳhud se pashemāñ

ishq kī chashm-e-yās kā aalam

pur-nam pur-nam sozāñ sozāñ

'sayyad' hijr meñ yuuñ jiite haiñ

koī hai ḳhvāhish aur na armāñ

rang parida zulf pareshan

chashm-e-ghazalan hairan hairan

gesu-e-mushkin shab ki siyahi

surat KHandan mah-e-taban

pahli pahli bar mile to

wo bhi nadan hum bhi nadan

un ka wo izhaar-e-mohabbat

thoDa zahir thoDa pinhan

un ki haalat waqt-e-ruKHsat

honT larazte aankhen giryan

un ka achanak tark-e-talluq

meri shikast-o-reKHt ka saman

mil jate hain rahe gahe

nadim nadim KHud se pasheman

ishq ki chashm-e-yas ka aalam

pur-nam pur-nam sozan sozan

'sayyad' hijr mein yun jite hain

koi hai KHwahish aur na arman