rang sare apne andar raftagan ke hain

rañg saare apne andar raftagāñ ke haiñ

ham ki barg-e-rā.egāñ naḳhl-e-ziyāñ ke haiñ

shīsha-e-umr-e-ravāñ se ḳhauf aatā hai

aks is meñ sā.at-e-kam-mehrbāñ ke haiñ

ham ko kyā lā-hāsilī hī ishq meñ gar hai

ham to ḳhūgar yuuñ bhī kār-e-rā.egāñ ke haiñ

tere kūche kī havā pūchhe hai ab ham se

naam kyā hai kyā nasab hai ham kahāñ ke haiñ

ham ko kyā arz o samā ke sab ḳhazānoñ se

ham to āshiq ek ism-e-jāvedāñ ke haiñ

mere partav ne tilism-e-tīrgī toḌā

aur ab raushan manāzir ḳhāk-dāñ ke haiñ

ham ko kyā mauj-e-fanā se ḳhauf aa.egā

muntazir ham ḳhud zavāl-e-rañg-e-jāñ ke haiñ

imtihāñ ye saḳhtiyāñ ye gardisheñ 'aslam'

sab ishāre ek chashm-e-mehrbāñ ke haiñ

rang sare apne andar raftagan ke hain

hum ki barg-e-raegan naKHl-e-ziyan ke hain

shisha-e-umr-e-rawan se KHauf aata hai

aks is mein saat-e-kam-mehrban ke hain

hum ko kya la-hasili hi ishq mein gar hai

hum to KHugar yun bhi kar-e-raegan ke hain

tere kuche ki hawa puchhe hai ab hum se

nam kya hai kya nasab hai hum kahan ke hain

hum ko kya arz o sama ke sab KHazanon se

hum to aashiq ek ism-e-jawedan ke hain

mere partaw ne tilism-e-tirgi toDa

aur ab raushan manazir KHak-dan ke hain

hum ko kya mauj-e-fana se KHauf aaega

muntazir hum KHud zawal-e-rang-e-jaan ke hain

imtihan ye saKHtiyan ye gardishen 'aslam'

sab ishaare ek chashm-e-mehrban ke hain