rang ubhar aae sab pas-e-diwar

rang ubhar aa.e sab pas-e-dīvār

itnī tīkhī thī raushnī kī dhaar

ḳhud meñ rahne kā ye bhī ḳhadsha hai

ho na jā.ūñ kahīñ maiñ apnā shikār

ab ke tanhā.ī jān-levā hai

ḳhud se bāhar nikal kisī ko pukār

ye nadī ab utar bhī jaa.e to kyā

kaun rahtā hai ab mirā us paar

kaam kitne hī rah ga.e mere

laTe aayā thā sub.h kā aḳhbār

apnī vīrāniyoñ meñ lauT aa.e

ham se dekhā gayā na rang-e-bahār

rang ubhar aae sab pas-e-diwar

itni tikhi thi raushni ki dhaar

KHud mein rahne ka ye bhi KHadsha hai

ho na jaun kahin main apna shikar

ab ke tanhai jaan-lewa hai

KHud se bahar nikal kisi ko pukar

ye nadi ab utar bhi jae to kya

kaun rahta hai ab mera us par

kaam kitne hi rah gae mere

laTe aaya tha subh ka aKHbar

apni viraniyon mein lauT aae

hum se dekha gaya na rang-e-bahaar