rangin bana ke daman-e-zaKHm-e-jigar ko main

rañgīñ banā ke dāman-e-zaḳhm-e-jigar ko maiñ

gulzār kar rahā huuñ fazā-e-nazar ko maiñ

gaatā huuñ sāz-e-dil pe tarāne sahar ko maiñ

bedār kar rahā huuñ kisī fitna-gar ko maiñ

mulzim nazar hai yā sar-e-shorīda kā qusūr

ka.aba samajh rahā huuñ tire sañg-e-dar ko maiñ

chun kar gul-e-niyāz qarīb-e-bisāt-e-dil

bāġh-e-iram banātā huuñ dāġh-e-jigar ko maiñ

vahshī banā huā hai mirī māntā nahīñ

allāh kyā karūñ dil-e-shorīda-sar ko maiñ

ai husn-e-dil-navāz mirī himmateñ to dekh

dil de ke muul letā huuñ dard-e-jigar ko maiñ

sañg-e-dar-e-habīb ko ka.aba banā na luuñ

jalva samajh ke husn-e-fareb-e-nazar ko maiñ

zāhid namāz-e-ishq kī tajdīd ke liye

phir us ke naqsh-e-pā pe jhukātā huuñ sar ko maiñ

merī tarah mujhe vo nazar aa.eñ be-qarār

kartā huuñ apnī aah meñ paidā asar ko maiñ

shāyad niyāz-mand ko hāsil niyāz ho

hasrat se tak rahā huuñ tirī rahguzar ko maiñ

kartā huuñ zabt-e-ġham ki na khul jaa.e rāz-e-ishq

dil meñ chhupā ke rakhtā huuñ tīr-e-nazar ko maiñ

'anvar' ga.iiñ na dil kī mire bad-gumāniyāñ

rahzan samajh rahā huuñ har ik rāhbar ko maiñ

rangin bana ke daman-e-zaKHm-e-jigar ko main

gulzar kar raha hun faza-e-nazar ko main

gata hun saz-e-dil pe tarane sahar ko main

bedar kar raha hun kisi fitna-gar ko main

mulzim nazar hai ya sar-e-shorida ka qusur

kaba samajh raha hun tere sang-e-dar ko main

chun kar gul-e-niyaz qarib-e-bisat-e-dil

bagh-e-iram banata hun dagh-e-jigar ko main

wahshi bana hua hai meri manta nahin

allah kya karun dil-e-shorida-sar ko main

ai husn-e-dil-nawaz meri himmaten to dekh

dil de ke mul leta hun dard-e-jigar ko main

sang-e-dar-e-habib ko kaba bana na lun

jalwa samajh ke husn-e-fareb-e-nazar ko main

zahid namaz-e-ishq ki tajdid ke liye

phir us ke naqsh-e-pa pe jhukata hun sar ko main

meri tarah mujhe wo nazar aaen be-qarar

karta hun apni aah mein paida asar ko main

shayad niyaz-mand ko hasil niyaz ho

hasrat se tak raha hun teri rahguzar ko main

karta hun zabt-e-gham ki na khul jae raaz-e-ishq

dil mein chhupa ke rakhta hun tir-e-nazar ko main

'anwar' gain na dil ki mere bad-gumaniyan

rahzan samajh raha hun har ek rahbar ko main