rangon ka tamannai na saudai hun ras ka

rangoñ kā tamannā.ī na saudā.ī huuñ ras kā

nashsha hai mire ḳhuuñ meñ abhī maut ke mas kā

baiThā huuñ kisī aur sadā ke liye varna

guzrā hai mire sar se bhī āvāza jaras kā

hai ruuh kā shab shor talātum to baḌī chiiz

ye jism kā johaḌ hī nahīñ hai mire bas kā

bahtā huā patta thā koī mauj-e-ravāñ par

chaḌhtā huā sar meñ koī dariyā thā havas kā

niklā huuñ nayā ho ke samundar ke safar par

peshānī se har daaġh dhulā pichhle baras kā

is tarh 'zafar' sab ko havā qaid karegī

degā na dikhā.ī kahīñ darvāza qafas kā

rangon ka tamannai na saudai hun ras ka

nashsha hai mere KHun mein abhi maut ke mas ka

baiTha hun kisi aur sada ke liye warna

guzra hai mere sar se bhi aawaza jaras ka

hai ruh ka shab shor talatum to baDi chiz

ye jism ka johaD hi nahin hai mere bas ka

bahta hua patta tha koi mauj-e-rawan par

chaDhta hua sar mein koi dariya tha hawas ka

nikla hun naya ho ke samundar ke safar par

peshani se har dagh dhula pichhle baras ka

is tarh 'zafar' sab ko hawa qaid karegi

dega na dikhai kahin darwaza qafas ka