ranj-e-giran-e-shauq ka hasil na kah ise

ranj-e-girān-e-shauq kā hāsil na kah ise

tark-e-safar kiyā hai tū manzil na kah ise

ye zabt zabt-e-ġham nahīñ ik be-dilī sī hai

ye dil harīf-e-dard nahīñ dil na kah ise

tuġhyāniyāñ kuchh aur haiñ maujoñ meñ ret kī

maiñ Dūbtā huuñ ishrat-e-sāhil na kah ise

martā nahīñ huuñ maut kī be-hāsilī pe maiñ

jiitā agar huuñ ulfat-e-hāsil na kah ise

milnā safar kā aur bichhaḌnā safar kā hai

duniyā to rahguzār hai mahfil na kah ise

ranj-e-giran-e-shauq ka hasil na kah ise

tark-e-safar kiya hai tu manzil na kah ise

ye zabt zabt-e-gham nahin ek be-dili si hai

ye dil harif-e-dard nahin dil na kah ise

tughyaniyan kuchh aur hain maujon mein ret ki

main Dubta hun ishrat-e-sahil na kah ise

marta nahin hun maut ki be-hasili pe main

jita agar hun ulfat-e-hasil na kah ise

milna safar ka aur bichhaDna safar ka hai

duniya to rahguzar hai mahfil na kah ise