ranj is ka nahin ki hum TuTe

rañj is kā nahīñ ki ham TuuTe

ye to achchhā huā bharam TuuTe

ek halkī sī Thes lagte hī

jaise koī gilās ham TuuTe

aa.ī thī jis hisāb se āñdhī

is ko socho to peḌ kam TuuTe

log choTeñ to pī ga.e lekin

dard karte hue raqam TuuTe

aa.ine aa.ine rahe garche

sāf-goī meñ dam-ba-dam TuuTe

shā.irī 'ishq bhuuk ḳhuddārī

'umr bhar ham to har qadam TuuTe

bāñdh TuuTā nadī kā kuchh aise

jis tarah se koī qasam TuuTe

ek afvāh thī sabhī rishte

TūTnā tai thā aur ham TuuTe

zindagī kañghiyoñ meñ Dhaal hameñ

terī zulfoñ ke pech-o-ḳham TuuTe

tujh pe marte haiñ zindagī ab bhī

jhuuT likkheñ to ye qalam TuuTe

ranj is ka nahin ki hum TuTe

ye to achchha hua bharam TuTe

ek halki si Thes lagte hi

jaise koi gilas hum TuTe

aai thi jis hisab se aandhi

is ko socho to peD kam TuTe

log choTen to pi gae lekin

dard karte hue raqam TuTe

aaine aaine rahe garche

saf-goi mein dam-ba-dam TuTe

shairi 'ishq bhuk KHuddari

'umr bhar hum to har qadam TuTe

bandh TuTa nadi ka kuchh aise

jis tarah se koi qasam TuTe

ek afwah thi sabhi rishte

TuTna tai tha aur hum TuTe

zindagi kanghiyon mein Dhaal hamein

teri zulfon ke pech-o-KHam TuTe

tujh pe marte hain zindagi ab bhi

jhuT likkhen to ye qalam TuTe