ranj-o-alam ki baadh mein iman bah gaya

ranj-o-alam kī baaḌh meñ īmān bah gayā

beTī ke jab jahez kā sāmān bah gayā

kuchh is tarah se TuuT ke ro.e tamām raat

jo bach gayā thā āḳhirī armān bah gayā

kal raat maiñ ne ḳhvāb meñ dekhā hai ek ḳhvāb

insāf āñkheñ pā gayā mīzān bah gayā

ye raaz khul sakā na kabhī is shu.ūr par

kyoñ mauj-e-ġham meñ ruuh kā juzdān bah gayā

ḳhāliq ko jaan kar bhī na pahchān paayā jab

us vaqt is ġhurūr meñ shaitān bah gayā

halkān ho rahī huuñ maiñ ye soch soch kar

sailāb-e-shar meñ kyoñ bhalā insān bah gayā

sajde meñ gir ke ashk bahā.e the 'shāz' chaar

dil kā makīn ruuh kā ḳhaljān bah gayā

ranj-o-alam ki baDh mein iman bah gaya

beTi ke jab jahez ka saman bah gaya

kuchh is tarah se TuT ke roe tamam raat

jo bach gaya tha aaKHiri arman bah gaya

kal raat main ne KHwab mein dekha hai ek KHwab

insaf aankhen pa gaya mizan bah gaya

ye raaz khul saka na kabhi is shuur par

kyon mauj-e-gham mein ruh ka juzdan bah gaya

KHaliq ko jaan kar bhi na pahchan paya jab

us waqt is ghurur mein shaitan bah gaya

halkan ho rahi hun main ye soch soch kar

sailab-e-shar mein kyon bhala insan bah gaya

sajde mein gir ke ashk bahae the 'shaz' chaar

dil ka makin ruh ka KHaljaan bah gaya