ranj sahte hain gham uThate hain

ranj sahte haiñ ġham uThāte haiñ

phir bhī ham muskurā.e jaate haiñ

tere kushtoñ kī hai yahī gangā

apne hī ḳhuun meñ nahāte haiñ

zabt se laakh kaam le koī

ishq ke raaz khul hī jaate haiñ

ham sā dushman na ho koī apnā

dostī kā fareb khāte haiñ

dil churāyā nahīñ agar merā

mujh se āñkheñ vo kyoñ churāte haiñ

soz-e-ulfat ke dil-nashīñ naġhme

sāz-e-dil par hī gaa.e jaate haiñ

ḳhush-dilī aate aate aatī hai

ranj-o-ġham jaate jaate jaate haiñ

rashk kī had hai ye ki ham un ko

apnī nazroñ se bhī chhupāte haiñ

manzil-e-dost aa ga.ī 'shaidā'

paañv kyoñ laḌkhaḌā.e jaate haiñ

ranj sahte hain gham uThate hain

phir bhi hum muskurae jate hain

tere kushton ki hai yahi ganga

apne hi KHun mein nahate hain

zabt se lakh kaam le koi

ishq ke raaz khul hi jate hain

hum sa dushman na ho koi apna

dosti ka fareb khate hain

dil churaya nahin agar mera

mujh se aankhen wo kyon churaate hain

soz-e-ulfat ke dil-nashin naghme

saz-e-dil par hi gae jate hain

KHush-dili aate aate aati hai

ranj-o-gham jate jate jate hain

rashk ki had hai ye ki hum un ko

apni nazron se bhi chhupate hain

manzil-e-dost aa gai 'shaida'

panw kyon laDkhaDae jate hain