raqib joD chala tum malal kar baiThe

raqīb joḌ chalā tum malāl kar baiThe

kidhar ḳhayāl gayā kyā ḳhayāl kar baiThe

ḳhayāl isī pe rahe dekh-bhāl kar baiThe

tumhārī bazm meñ dil ko sañbhāl kar baiThe

mire gunāh par in zāhidoñ ko hairat hai

ye aadmī ko farishta ḳhayāl kar baiThe

bachā.ūñ kyūñkar ise kis tarah unheñ Tālūñ

ġhazab huā ki vo dil kā savāl kar baiThe

raqīb ḳhush hue ab to tumheñ qarār aaya

ki misl-e-rang mirā ḳhuun uchhāl kar baiThe

falak kī chaal hai ye aadmī kī chaal nahīñ

chale to lākhoñ hī ko pā.emāl kar baiThe

ḳhamosh kyoñ ho ye nutq aadmī kā zevar hai

jo koī baiThe kahīñ bol chaal kar baiThe

ḳhabar nahīñ ki hai kājal kī koTharī duniyā

yahāñ jo baiThe vo dāman sañbhāl kar baiThe

jahāñ hai naqsh-bar-āb is meñ dam ke dam hai qiyām

koī kisī se yahāñ kyā malāl kar baiThe

taḌap rahā thā zamīñ par taḌapne dete tum

kisī kā dil ho koī pā.emāl kar baiThe

TaTolte haiñ jigar ko ki dil ko DhūñDte haiñ

vo mere siine meñ kyoñ haath Daal kar baiThe

vo merā dil nahīñ ai jaañ raqīb kā dil hai

tumhārā tiir jagah dekh bhaal kar baiThe

kiyā ḳhayāl zarā bhī na ḳhūn-e-āshiq kā

hinā se tum kaf-e-gul-rang laal kar baiThe

hujūm chāk-garebānoñ kā hai kūche meñ

huzūr parde se kyoñ sar nikāl kar baiThe

ye kyā kiyā ki unheñ de diyā dil ai 'akbar'

tumheñ ḳhabar nahīñ vo tum se chaal kar baiThe

raqib joD chala tum malal kar baiThe

kidhar KHayal gaya kya KHayal kar baiThe

KHayal isi pe rahe dekh-bhaal kar baiThe

tumhaari bazm mein dil ko sanbhaal kar baiThe

mere gunah par in zahidon ko hairat hai

ye aadmi ko farishta KHayal kar baiThe

bachaun kyunkar ise kis tarah unhen Talun

ghazab hua ki wo dil ka sawal kar baiThe

raqib KHush hue ab to tumhein qarar aaya

ki misl-e-rang mera KHun uchhaal kar baiThe

falak ki chaal hai ye aadmi ki chaal nahin

chale to lakhon hi ko paemal kar baiThe

KHamosh kyon ho ye nutq aadmi ka zewar hai

jo koi baiThe kahin bol chaal kar baiThe

KHabar nahin ki hai kajal ki koThari duniya

yahan jo baiThe wo daman sanbhaal kar baiThe

jahan hai naqsh-bar-ab is mein dam ke dam hai qiyam

koi kisi se yahan kya malal kar baiThe

taDap raha tha zamin par taDapne dete tum

kisi ka dil ho koi paemal kar baiThe

TaTolte hain jigar ko ki dil ko DhunDte hain

wo mere sine mein kyon hath Dal kar baiThe

wo mera dil nahin ai jaan raqib ka dil hai

tumhaara tir jagah dekh bhaal kar baiThe

kiya KHayal zara bhi na KHun-e-ashiq ka

hina se tum kaf-e-gul-rang lal kar baiThe

hujum chaak-garebanon ka hai kuche mein

huzur parde se kyon sar nikal kar baiThe

ye kya kiya ki unhen de diya dil ai 'akbar'

tumhein KHabar nahin wo tum se chaal kar baiThe