raqs-e-nairangi hai nazzaron ke bich

raqs-e-nairañgī hai nazzāroñ ke biich

jī rahā huuñ sho.abada-kāroñ ke biich

ek duniyā ko hai luT jaane kā Dar

ek ham haiñ luT ga.e yāroñ ke biich

shikva-e-jaur-o-jafā kis se karūñ

pyaar se mahrūm huuñ pyāroñ ke biich

mulk-o-millat qaum-o-maz.hab dosto

kyā nahīñ biktā ḳharīdāroñ ke biich

azmat-e-havvā kā ik aur aa.ina

ho gayā nīlām bāzāroñ ke biich

asl rishta to zamīñ se hai mirā

yaad aayā mujh ko sayyāroñ ke biich

shauq-e-ḳhud-ārā.ī ke hāthoñ huā

ik hayūlā qaid dīvāroñ ke biich

yā-ilāhī rahm karnā aaj vo

aa ga.e chal ke talab-gāroñ ke biich

mere dam se hī huī hai raushnī

dasht-o-sahrā aur kohsāroñ ke biich

ai bahār-e-abr-e-nau jaldī baras

jal rahe haiñ ḳhvāb añgāroñ ke biich

mujh meñ hai maujūd parvāz-e-'ḳhayāl'

mo'atabar huuñ maiñ bhī fankāroñ ke biich

raqs-e-nairangi hai nazzaron ke bich

ji raha hun shoabada-karon ke bich

ek duniya ko hai luT jaane ka Dar

ek hum hain luT gae yaron ke bich

shikwa-e-jaur-o-jafa kis se karun

pyar se mahrum hun pyaron ke bich

mulk-o-millat qaum-o-mazhab dosto

kya nahin bikta KHaridaron ke bich

azmat-e-hawwa ka ek aur aaina

ho gaya nilam bazaron ke bich

asl rishta to zamin se hai mera

yaad aaya mujh ko sayyaron ke bich

shauq-e-KHud-arai ke hathon hua

ek hayula qaid diwaron ke bich

ya-ilahi rahm karna aaj wo

aa gae chal ke talab-garon ke bich

mere dam se hi hui hai raushni

dasht-o-sahra aur kohsaron ke bich

ai bahaar-e-abr-e-nau jaldi baras

jal rahe hain KHwab angaron ke bich

mujh mein hai maujud parwaz-e-'KHayal'

mo'atabar hun main bhi fankaron ke bich