raqs karte mastiyon ke sainkaDon aalam gae

raqs karte mastiyoñ ke saiñkaḌoñ aalam ga.e

mahfil-e-jam ban ga.ī jis anjuman meñ ham ga.e

har alam se har balā se mil ga.ī dil ko najāt

jab se terā ġham milā hai apne saare ġham ga.e

aa ga.ī kyā jāniye phir kis masīhā-dam kī yaad

dard-e-paiham ruk gayā ashk-e-musalsal tham ga.e

chhā ga.iiñ rindān-e-mahfil par balā kī mastiyāñ

bazm meñ jis samt chhalkāte vo jām-e-jam ga.e

kaun kahtā hai fazā-e-dahr ab barham nahīñ

kaun kahtā hai tirī zulfoñ ke pech-o-ḳham ga.e

thā vo takiya ham faqīroñ kā hī ai hamdam jahāñ

jubba-sā.ī ko hazāroñ akbar-e-āzam ga.e

rah ga.e aġhyār sab hairān-o-shashdar ai 'umīd'

is adā se aaj un kī anjuman meñ ham ga.e

raqs karte mastiyon ke sainkaDon aalam gae

mahfil-e-jam ban gai jis anjuman mein hum gae

har alam se har bala se mil gai dil ko najat

jab se tera gham mila hai apne sare gham gae

aa gai kya jaaniye phir kis masiha-dam ki yaad

dard-e-paiham ruk gaya ashk-e-musalsal tham gae

chha gain rindan-e-mahfil par bala ki mastiyan

bazm mein jis samt chhalkate wo jam-e-jam gae

kaun kahta hai faza-e-dahr ab barham nahin

kaun kahta hai teri zulfon ke pech-o-KHam gae

tha wo takiya hum faqiron ka hi ai hamdam jahan

jubba-sai ko hazaron akbar-e-azam gae

rah gae aghyar sab hairan-o-shashdar ai 'umid'

is ada se aaj un ki anjuman mein hum gae