raqs karti hai faza wajd mein jam aaya hai

raqs kartī hai fazā vajd meñ jaam aayā hai

phir koī le ke bahāroñ kā payām aayā hai

bāda-ḳhvārān-e-fanā baḌh ke qadam lo us ke

le ke sāġhar meñ jo sahbā-e-davām aayā hai

maiñ ne sīkhā hai zamāne se mohabbat karnā

terā paiġhām-e-mohabbat mire kaam aayā hai

rahbar-e-jāda-e-haq nūr-e-ḳhudā haadī deñ

le ke ḳhāliq kā zamāne meñ payām aayā hai

terī manzil hai buland itnī ki har shām-o-sahar

chāñd-sūraj se tire dar ko salām aayā hai

ho gayā terī mohabbat meñ giraftār to phir

tā.er-e-rūh bhalā kab tah-e-dām aayā hai

ḳhud-ba-ḳhud jhuk ga.ī peshānī-e-arbāb-e-ḳhudī

ishq kī raah meñ aisā bhī maqām aayā hai

āsiyo shukr kī jā hai ki ba-faiz-e-ḳhāliq

ham gunahgāroñ kī baḳhshish kā payām aayā hai

haram-o-dair ke logoñ kī ḳhushī kyā kahnā

banda-e-ḳhāliq-o-dil-dāda-e-rām aayā hai

tishna-kāmān-e-nazāra ko ye muzhda de do

be-naqāb aaj koī phir sar-e-bām aayā hai

ho mubārak tumheñ rindo ki ba-tā.īd-e-ḳhudā

koī chhalkātā huā shīsha-o-jām aayā hai

jab kabhī gardish-e-daurāñ ne satāyā hai bahut

tere rindoñ kī zabāñ par tirā naam aayā hai

ahl-e-maġhrib ko pilā kar mai-e-irfāñ 'darshan'

phir se mashriq kī taraf arsh-maqām aayā hai

raqs karti hai faza wajd mein jam aaya hai

phir koi le ke bahaaron ka payam aaya hai

baada-KHwaran-e-fana baDh ke qadam lo us ke

le ke saghar mein jo sahba-e-dawam aaya hai

main ne sikha hai zamane se mohabbat karna

tera paigham-e-mohabbat mere kaam aaya hai

rahbar-e-jada-e-haq nur-e-KHuda hadi den

le ke KHaliq ka zamane mein payam aaya hai

teri manzil hai buland itni ki har sham-o-sahar

chand-suraj se tere dar ko salam aaya hai

ho gaya teri mohabbat mein giraftar to phir

taer-e-ruh bhala kab tah-e-dam aaya hai

KHud-ba-KHud jhuk gai peshani-e-arbab-e-KHudi

ishq ki rah mein aisa bhi maqam aaya hai

aasiyo shukr ki ja hai ki ba-faiz-e-KHaliq

hum gunahgaron ki baKHshish ka payam aaya hai

haram-o-dair ke logon ki KHushi kya kahna

banda-e-KHaliq-o-dil-dada-e-ram aaya hai

tishna-kaaman-e-nazara ko ye muzhda de do

be-naqab aaj koi phir sar-e-baam aaya hai

ho mubarak tumhein rindo ki ba-taid-e-KHuda

koi chhalkata hua shisha-o-jam aaya hai

jab kabhi gardish-e-dauran ne sataya hai bahut

tere rindon ki zaban par tera nam aaya hai

ahl-e-maghrib ko pila kar mai-e-irfan 'darshan'

phir se mashriq ki taraf arsh-maqam aaya hai