rasm-e-mai-KHana nibhate hain chale jate hain

rasm-e-mai-ḳhāna nibhāte haiñ chale jaate haiñ

apne hisse kī uThāte haiñ chale jaate haiñ

jaane kyā soch ke aate haiñ chale jaate haiñ

hausla merā baḌhāte haiñ chale jaate haiñ

rābta hai na ta'alluq hai koī pahlā sā

raftagāñ ḳhvāb meñ aate haiñ chale jaate haiñ

vo jo lafzoñ ke ulaT-pher ko fan kahtā hai

us ko mīzān thamāte haiñ chale jaate haiñ

māntā huuñ ki haiñ haa.il ka.ī parbat lekin

ham ye dīvār girāte haiñ chale jaate haiñ

ḳhauf ke saa.e meñ kyoñ ḳhatm ho sochoñ kā safar

aao hañste haiñ hañsāte haiñ chale jaate haiñ

jis ko aanā hai vo aa.egā hameñ fikr nahīñ

ham to āvāz lagāte haiñ chale jaate haiñ

ġham bhī apnā hai 'na'īm' aaj tazabzub kā shikār

ashk palkoñ talak aate haiñ chale jaate haiñ

rasm-e-mai-KHana nibhate hain chale jate hain

apne hisse ki uThate hain chale jate hain

jaane kya soch ke aate hain chale jate hain

hausla mera baDhate hain chale jate hain

rabta hai na ta'alluq hai koi pahla sa

raftagan KHwab mein aate hain chale jate hain

wo jo lafzon ke ulaT-pher ko fan kahta hai

us ko mizan thamate hain chale jate hain

manta hun ki hain hail kai parbat lekin

hum ye diwar giraate hain chale jate hain

KHauf ke sae mein kyon KHatm ho sochon ka safar

aao hanste hain hansate hain chale jate hain

jis ko aana hai wo aaega hamein fikr nahin

hum to aawaz lagate hain chale jate hain

gham bhi apna hai 'na'im' aaj tazabzub ka shikar

ashk palkon talak aate hain chale jate hain