rasm hoti hai meri ab bhi ada mere baad

rasm hotī hai mirī ab bhī adā mere baa'd

ḳhaak uḌātī hai bayābāñ meñ sabā mere baa'd

ishq ko mere junūñ kah ke navāzā tum ne

haa.e rusvā mujhe kyā kyā na kiyā mere baa'd

ab mirī tarah kise khīñch ke shāmat laa.ī

kaun hai hāsil-e-be-dād-o-jafā mere baa'd

abr to chhāte haiñ mai-ḳhāne pe ab bhī lekin

lutf mādūm mukaddar hai fazā mere baa'd

mere jaate hī gulistāñ pe udāsī chhā.ī

phuul to phuul haiñ sabza na ugā mere baa'd

pūchhne vaalā hī thā kaun jahāñ meñ 'tālib'

naam bhī miT gayā achchhā hī huā mere baa'd

rasm hoti hai meri ab bhi ada mere ba'd

KHak uDati hai bayaban mein saba mere ba'd

ishq ko mere junun kah ke nawaza tum ne

hae ruswa mujhe kya kya na kiya mere ba'd

ab meri tarah kise khinch ke shamat lai

kaun hai hasil-e-be-dad-o-jafa mere ba'd

abr to chhate hain mai-KHane pe ab bhi lekin

lutf madum mukaddar hai faza mere ba'd

mere jate hi gulistan pe udasi chhai

phul to phul hain sabza na uga mere ba'd

puchhne wala hi tha kaun jahan mein 'talib'

nam bhi miT gaya achchha hi hua mere ba'd