raunaq-e-arz-o-sama shams o qamar main hi hun

raunaq-e-arz-o-samā shams o qamar maiñ hī huuñ

ġhaur se dekhiye tā-hadd-e-nazar maiñ hī huuñ

ho liye saare tamāshā.ī kisī manzil ke

rah gayā maiñ so sar-e-rāhguzar maiñ hī huuñ

mujh se mat pūchh ki kis tarah se ujḌī bastī

mujh ko bas dekh le rūdād-o-ḳhabar maiñ hī huuñ

maiñ bhī muhtāj-e-masīhā.ī tirā huuñ lekin

mat idhar aa ki mirī jaan idhar maiñ hī huuñ

mire malbūs haiñ kim-ḳhvāb ke paivand lage

ḳhvāb meñ shaam kā ta.abīr-e-sahar maiñ hī huuñ

kashtiyāñ likhtī raheñ roz kahānī apnī

mauj kahtī hī rahī zer-o-zabar maiñ hī huuñ

vus.at-e-kārgah-e-shīsha-garī ma.āz-allāh

ḳhaak maiñ jaam bhī maiñ dast-e-hunar maiñ hī huuñ

raunaq-e-arz-o-sama shams o qamar main hi hun

ghaur se dekhiye ta-hadd-e-nazar main hi hun

ho liye sare tamashai kisi manzil ke

rah gaya main so sar-e-rahguzar main hi hun

mujh se mat puchh ki kis tarah se ujDi basti

mujh ko bas dekh le rudad-o-KHabar main hi hun

main bhi muhtaj-e-masihai tera hun lekin

mat idhar aa ki meri jaan idhar main hi hun

mere malbus hain kim-KHwab ke paiwand lage

KHwab mein sham ka tabir-e-sahar main hi hun

kashtiyan likhti rahen roz kahani apni

mauj kahti hi rahi zer-o-zabar main hi hun

wusat-e-kargah-e-shisha-gari maaz-allah

KHak main jam bhi main dast-e-hunar main hi hun