raushan hai zamane mein afsana mohabbat ka

raushan hai zamāne meñ afsāna mohabbat kā

ḳhurshīd-e-mohabbat hai paimāna mohabbat kā

ai zāhid-e-nādāñ vo kyā dair-o-haram jaane

dil jis kā azal se ho dīvāna mohabbat kā

rangīn shuāoñ se māmūr hai har zarra

ābād tajallī hai vīrāna mohabbat kā

qatra bhī mujhe aksar dariyā nazar aatā hai

jis din se piyā maiñ ne paimāna mohabbat kā

jaarī rahe mai-noshī mastān-e-mohabbat kī

ābād ḳhudā rakhe mai-ḳhāna mohabbat kā

āġhāz se be-parvā anjām se nā-vāqif

āzād hai har ġham se dīvāna mohabbat kā

jo ḳhud se ho be-parvā aur ishq se begāna

ai 'dard' vo kyā samjhe afsāna mohabbat kā

raushan hai zamane mein afsana mohabbat ka

KHurshid-e-mohabbat hai paimana mohabbat ka

ai zahid-e-nadan wo kya dair-o-haram jaane

dil jis ka azal se ho diwana mohabbat ka

rangin shuaon se mamur hai har zarra

aabaad tajalli hai virana mohabbat ka

qatra bhi mujhe aksar dariya nazar aata hai

jis din se piya main ne paimana mohabbat ka

jari rahe mai-noshi mastan-e-mohabbat ki

aabaad KHuda rakhe mai-KHana mohabbat ka

aaghaz se be-parwa anjam se na-waqif

aazad hai har gham se diwana mohabbat ka

jo KHud se ho be-parwa aur ishq se begana

ai 'dard' wo kya samjhe afsana mohabbat ka