raushan har ek samt charagh-e-nazar to ho

raushan har ek samt charāġh-e-nazar to ho

hukm-e-safar se pahle hisāb-e-safar to ho

is shahr kā sukūt kabhī TūTtā nahīñ

chīḳhūñ to merī chīḳh meñ koī asar to ho

maiñ to siyāh raat ke zindāñ meñ huuñ asiir

saaya mirā kahāñ hai mujhe kuchh ḳhabar to ho

paanī kā ye bahāo nadī kī shanāḳht hai

ab mere barf barf badan meñ sharar to ho

fasl-e-bahār se maiñ karūñ iltijā-e-gul

sahrā-e-be-kanār meñ koī shajar to ho

chāroñ taraf dhuāñ hī dhuāñ hai fazāoñ meñ

manzar koī khule kabhī nūr-e-sahar to ho

āñdhī chale aur us meñ jalā deñ koī charāġh

'shāhid' hamāre haath meñ aisā hunar to ho

raushan har ek samt charagh-e-nazar to ho

hukm-e-safar se pahle hisab-e-safar to ho

is shahr ka sukut kabhi TuTta nahin

chiKHun to meri chiKH mein koi asar to ho

main to siyah raat ke zindan mein hun asir

saya mera kahan hai mujhe kuchh KHabar to ho

pani ka ye bahao nadi ki shanaKHt hai

ab mere barf barf badan mein sharar to ho

fasl-e-bahaar se main karun iltija-e-gul

sahra-e-be-kanar mein koi shajar to ho

chaaron taraf dhuan hi dhuan hai fazaon mein

manzar koi khule kabhi nur-e-sahar to ho

aandhi chale aur us mein jala den koi charagh

'shahid' hamare hath mein aisa hunar to ho