raushan kisi bhi taur meri zindagi nahin

raushan kisī bhī taur mirī zindagī nahīñ

maiñ jal rahā huuñ aur koī raushnī nahīñ

sukh dukh to aate jaate hī rahte haiñ 'umr-bhar

dariyā meñ koī mauj kabhī āḳhirī nahīñ

ḳhauf-e-ḳhudā se duniyā meñ har ehtiyāt hai

ḳhauf-e-ḳhudā nahīñ to koī ḳhauf bhī nahīñ

ye 'ishq kā safar hai satat chalte jā.iye

ye vo safar hai jis meñ kabhī vāpsī nahīñ

afsos koī aur bhī terā na ho sakā

mujh ko tire talāq se koī ḳhushī nahīñ

ro.e ho merī vaj.h se tum kitnī martaba

lekin tumhārī hañsne kī 'ādat ga.ī nahīñ

kamzor the jo log vo sab Duub hī ga.e

dariyā ke bhī mizāj meñ dariyā-dilī nahīñ

duniyā zabāñ-darāz hai ham kyā javāb deñ

ye bolne se pahle kabhī sochtī nahīñ

is jism par savār hai ik rūh-e-jāvedāñ

ye rāsta nayā hai savārī na.ī nahīñ

vo bhī mirī ġhazal meñ kamī DhūñDhte rahe

jin kī ġhazal meñ ḳhud hī kamī kī kamī nahīñ

raushan kisi bhi taur meri zindagi nahin

main jal raha hun aur koi raushni nahin

sukh dukh to aate jate hi rahte hain 'umr-bhar

dariya mein koi mauj kabhi aaKHiri nahin

KHauf-e-KHuda se duniya mein har ehtiyat hai

KHauf-e-KHuda nahin to koi KHauf bhi nahin

ye 'ishq ka safar hai satat chalte jaiye

ye wo safar hai jis mein kabhi wapsi nahin

afsos koi aur bhi tera na ho saka

mujh ko tere talaq se koi KHushi nahin

roe ho meri wajh se tum kitni martaba

lekin tumhaari hansne ki 'adat gai nahin

kamzor the jo log wo sab Dub hi gae

dariya ke bhi mizaj mein dariya-dili nahin

duniya zaban-daraaz hai hum kya jawab den

ye bolne se pahle kabhi sochti nahin

is jism par sawar hai ek ruh-e-jawedan

ye rasta naya hai sawari nai nahin

wo bhi meri ghazal mein kami DhunDhte rahe

jin ki ghazal mein KHud hi kami ki kami nahin