raushan na hui thi subh abhi munh khol rahi hai sham kahin

raushan na huī thī sub.h abhī muñh khol rahī hai shaam kahīñ

āġhāz na hone paayā thā aur hone lagā anjām kahīñ

is duniyā meñ kyā milnā hai bas armānoñ ke ḳhuuñ ke sivā

ai ḳhvāb-e-hasīñ tere chalte ho jaa.eñ na ham badnām kahīñ

mānind-e-sabā āvāra ham phirte hī rahe shahroñ shahroñ

ramtā jogī bahtā paanī hai sub.h kahīñ to shaam kahīñ

is vaqt to ḳhush aate haiñ nazar kuchh sāda-lauh anādil bhī

dekho to na phir phailāyā ho sayyād ne koī daam kahīñ

sayyād se gar laḌnā hai tujhe shāhīñ kā jigar paidā kar le

bulbul jaise nāzuk dil se hotā hai jarī iqdām kahīñ

kuchh ziist kā ġham kuchh millat kā maġhmūm rahe har dam 'az.har'

hassās tabī.at vāloñ ko miltā hai bhalā ārām kahīñ

raushan na hui thi subh abhi munh khol rahi hai sham kahin

aaghaz na hone paya tha aur hone laga anjam kahin

is duniya mein kya milna hai bas armanon ke KHun ke siwa

ai KHwab-e-hasin tere chalte ho jaen na hum badnam kahin

manind-e-saba aawara hum phirte hi rahe shahron shahron

ramta jogi bahta pani hai subh kahin to sham kahin

is waqt to KHush aate hain nazar kuchh sada-lauh anadil bhi

dekho to na phir phailaya ho sayyaad ne koi dam kahin

sayyaad se gar laDna hai tujhe shahin ka jigar paida kar le

bulbul jaise nazuk dil se hota hai jari iqdam kahin

kuchh zist ka gham kuchh millat ka maghmum rahe har dam 'azhar'

hassas tabiat walon ko milta hai bhala aaram kahin